Najaane log 'Bismi-llah-ir-Rahman-ir-Raheem' ki Nizaam mein karfamayee samajhte bhi hain ke nahin! Kia kisi nizaam ki ibteda baghair Wujood-e-Khuda sabit hoti hai? Kia aapke ilm mein nahin aata ke aaj bhi jab qadeem-tareen bastiyon ke nuqoosh zameen ke seene ki gehraaiyon se sar uthaate hain to unki aaghoshe-e-daaman mein aik shai zuroor nazar aati hai aur wo hai 'Moortiyan'. Qadeem-tareen Sahayaf jo Khuda ke hone ka zikr karte hain wo hain Kutub-e-Hunood. Husool-e-Khabar to door ki baat, kia Ahsaas-e-Wujood-e-Khuda bhi bagahir Targheeb-e-Khuda mumkin hai? Sochiye! aik haiwaan jo is la-inteha Kainaat mein zameen jaisi uthaa gehraaiyon aur andheron mein 'jahaalat' ki ghutan ke sath aankh kholta hai, jo apne atraaf ke baare mein to kia apne baare mein kuchh nahin jaanta, jiske khayal ki parwaaz ki had 'ghizaa' tak hai, use aik din Khuda ka khayal aata hai!! Kia ye mo'jizaa nahin? Kia ye Nateeja-e-Wahi nahin? Ye jaanne ke bawajood ke Khuda ka Paigham pehle insan ko ataa huwa, ham doosre insan ko is Paigham se khaarij karte hain! Yaqeenan aap Adam ka ta'alluq usi tehzeeb se joreinge jo qadeem-tareen hai na ke jadeed-tareen. Adam-o-Hawwa kaun the? Adam ki 'mitti' se khalqat zameen par huwi ya asmaanon mein? Jannat se 'neeche' utaare jaane ka kia matlab tha? Is mazmoon mein main us hairat-angez raaz se pardah uthaoonga jo abhi tak seegha-e-raaz mein hai.
Tawrah bayaan karti hai ke Khuda ne jis Baagh-e-Adn mein Adam-o-Hawwa ko rakha wo zameen ke Mashriq mein tha (The Book of Genesis 2: 8-14). Is Baagh se chaar darya behte the jo zameen ke Maghrib ko sairaab karte the (1) Pishon, (2) Gihon, (3) Dijlah aur (4) Furat. In mein se do darya, Dijlah aur Furrat, aaj bhi maujood hain lekin Pishon aur Gihon ke aasaar mit chuke hain. Ye darya jis taraf se behte hain wo Sarzameen-e-Hind hai. Aasaar batate hain ke darya Pishon ka taalluq Ahl-e-Pashtoon se tha. Mash'hoor Yahoodi Tareekh-dan Flavius Josephus ke mutaabiq ye qadeem Pishon Hind ki Ganga hai. Jadeed Arab Muhaqiqeen ke mutabiq lafz 'Gihon' ka taalluq dar'asl Afghan aur Uzbek zabanon se hai jahan ye darya baha karta tha aur ye ke jis 'Cush' ke ilaaqe se ye guzarta tha wo 'Cush' Ethiopia ka nahin Hind ka 'Hindu-Kush' hai. Teesre aur chauthe darya Dijlah aur Furrat se aap waaqif hi hain. Ye waazeh hai ke ye donon Iraaq se nahin nikalte balke guzarte hain. Bagh-e-Adn ke Hind mein hone ke beshumar shawaahid maujood hain jinko darpardah rakha jata hai maslan: Zameen ka Mashriq Hindustan hai jahan Khuda ne Jannat ka Bagh lagaya, Isi Jannat mein Khuda ka Noor Basoorat-e-Shiva pehli baar ba-rooy-e-Adam Himaliya ke buland Pahaaron par zaahir huwa jaisa ke baad mein Moosa ke saamne Kauh-e-Tur par zaahir huwa. Adam's Peak Sri-Lanka mein hai jahan aik paaon ka nishan maujood hai, jo ke Hinduon ke mutabiq Shiva ka, Buddhist ke mutabiq Budhha ka, Muslim ke mutabiq Adam ka hai. Kia ye mumkin nahin ke jis Rasool ka Nishan-e-Paa Samri ne Kauh-e-Tur ke paas dekha wo aasaar isi Na-Khuda ke hon? (Qur'anic Ref 20: 96) Kia wo Buland Muqam-e-Jannat, jahan se Ahl-e-Jannat ko neeche utar jaane ka hukum huwa, Himaliya ke buland pahaar nahin? Kia Shaitan ko jis zameen se kharij kiya gaya aur jahan par wo apni tamam Shaitani quwwaton samet laut aaya wo Sarzameen-e-Hind nahin? Kyon Hind aaj bhi jaadu, tauhommat aur karamat ki sarzameen hai? Saanp, jise Shaitan ne apne husoole- maqsad keliye mu'attabar zarya samjha wo aaj bhi Hindustan mein pooje jaate hain. Saanp ki rasaai kaheen ho na ho Shiva tak to thee jinki gardan mein ye para nazar aata hai? (See all the Emblems of Lord Shiva) Kyon Moosa isko khoonte par latka kar Ahl-e-Yahood ke saamne isko Nishan-e-Ibrat banata hai? (The Book of Numbers 21: 8, 9) Kyon Moosa ka sahara, yaani unki laathi, Saanp mein tabdeel hoti thee aur hath, jo use istemal karta tha, Noor mein? Arab ke jis ilaaqe mein Khuda ka Pehla Ghar, Khanaa-e-Kaabah, hai, uska naam 'Sheba' tha. Kia ye 'Shiva' nahin? (The Books of Genesis 21:14; of Isaiah 60: 6,7) Kia Ibrahim a.s se shuroo hone waali mardana rasm, Sunnat, Shiva-Pooja yaani 'Phallus-cult' ka nateejah nahin? Bataye ke Moosa ne Allah ko kahan bolte suna, Noor mein ya Shiva ki taaqat Naar mein?

Qudrat har kaam ki ibteda sirf Paak Naam hi se nahin balke Paak Waqt aur Muqaam se bhi karti hai. Na sirf Khudai ilm ke aasaar balke duniyawi uloom ki ibteda bhi Sarzameen-e-Hind se hoti hai jiska suboot hai Zaban-e-Sanskrit jisne tamam zabanon ko janam diya, pehli taraqqi-yafta tehzeeb Arya Samaaj, Ilm-e- Falsafah, Ginti (Numerals, Digits) aur Ilm-e-Funoon khaskar Fan-e-Tameer, Naqqashi, Dastkaari aur Mauseeqi hai. Kia aap nahin socheinge ke har aik baat ki ibteda Hind kyon hai? Kia iske pas-e-pusht Khudai Hath nahin?

Aakhir Hindu maz'hab ke azeem-tareen Devta Brahma, Vishnu aur Shiva ki haqeeqat kia hai? Ye kaun hain jinka Noor samaawat mein azl se maujood raha? Kaun maanega ke Brahma, is Maddi dunia mein Vishnu aur Shiva ko janam dene wala, tamam mubarak qaumon ko paida karne wala, koi aur nahin Ibrahim hai jisne qaum-e-Hunood, Yahood, Nasara aur Muslim ko janam diya? Kaun samajhna chahega ke Rig-Ved ke zarye Manaasik-e- Ibaadat sikhaane wala koi aur nahin Ibrahim hi hai? (Qur'anic Ref 2:128) Kaun tafakkur karega ke Sma-Ved, jo El (Khuda) keliye Geet sikhaati hai, Ibrahim ke betay Isma-il se mansoob hai? Kaun soch sakega ke 12 Jyotir Linga (12 Pathhar yaani Shiva-lingam jo Hindustan mein 12 mukhtalif mandiron mein nasb hain) Isma'il ke 12 beton ki tamseel hain aur Himaliya mein rakha 12-wan 'Kedar-nath' Muhammad aur Mahdi ke Jadd-e-Amjad 'Kedar' ki? (Biblical Ref. The First Book of Chronicles 1:29-31; cf. The Book of Isaiah 42:9-13; 60: 5-7) Kaun maanega ke Vishnu, Maaddi Qawaaneen par hukumrani karne wala, tamam duniya ka Badshah, Khatam-un-Nabiyyeen ka asmaani Roop hai? (The Gospel of John 14:30) Kia Qaume- Muslimeen kabhi ye maan paayeigi ke Hinduon ke aakhri Ma'ood Mahadev jinke wo muntazir hain unhi ke muntazar Mahdi hain jinka muqaam Hind tha aur rahega? Haqeeqatein parde mein kab tak raheingi? Aakhir kab tak?